CCLXXI.

1381, Mai 5. Münsterberg.

Urkunde des Raths der Stadt Münsterberg über die Verzichtleistung des Bernhard Hübner auf alle Ansprüche an das Kloster.

Ich Ticze Richinsthein genant burgermeystir zu Monstirberg vnd wir hernoch geschrebenen Michil Schopcz, Heynrich Karczin, Niccil Berynger, Bartolomeus Cromer rotmane vnd gesworne burgere doselbist zu Monstirberg des keginwortigin iaris tun kunt vnd bekennen offinlichin, den keginwortigen vnd den zukunftigin, das vor vns komen ist in vnsere keginwortigkeyt mit wohlbedochtim mute vnd mit rote siner frunde sundirlichin dorubir gehabit Bernhart Hubener genant vnd hot bekant vnd gesprochin, das her sich dirvarn hot vm dy ansproche, dy her gehabit hot kegin den erbern herren dem apte zu Kamencz vnd syner sammenunge vnd ouch eren guteren, das her keyne schult noch keyne sache zu en vnd ouch zu eren guteren nicht hot, noch gehabit hot in keyner mosse. Sundir der obgenante Bernhart vor vns gestondin hot vnd hot dy obgeschrebenen herren von Kamencz vnd ouch ere gutere aller ansproche vrye, ledig vnd los gelossin nu vnd zu zukunftigin geczitin, vnschedelich den bryuen vnd ouch den burgin, dy vormols dorubir gezaczt sint. Mit orkund desis bryves, den wier mit vnserme hangindin statyngesegil habin gegebin zu eyner wissinschaft vnd zu eyner stetin bevestenunge desir sochin vnd ist geschen, alz man schribit noch Cristis geburte dryczenhundirt vnd in dem erstin vnd achczigistin iar an dem nestin suntage vor Stanislay.

Or. Perg. Das S. der Stadt Münsterberg (kleines Rundsiegel mit dem bekannten Wappenbilde der Stadt M.; vgl. Saurma Sp. 200 flgd.) an einem Pergamentstreifen.

Codex Diplomaticus Silesiae, hrsg vom Vereine für Geschichte und Alterthum Schlesiens, Bd 10, Urkunden des Kloster Kamenz. Hrsg von Dr Paul Pfotenhauer, Breslau 1881.